Heut war i kurz im Kaffeehaus. Sitzen zwoa elegante Herren neben mir, der oane mit an schwarzn Sakko, der and're mit an blauen. Sie diskutiern und - weil i genau danebn sitz - i hör mit.
Der Schwarze: "Des is wirklich a Witz. Da g'winnt der mit an ganz an knappn Vorsprung die Wahl. Des passt aber dem Parteichef vom Gegenkandidaten gar net. Für eam hat da eindeutig der Falsche gwunna und er lasst die Wahl anfechtn. Als Begründung gibt er an: Die Wahlbehörde is Schuld. Da habm die falschen Leut auszöhlt. Es gibt zwar koan Beweis, dass die Auszählung net gstimmt hat, aber die Wahl wird doch tasächlich aufg'hobm. Is a Wahnsinn, so was!"
Der Blaue: "Ja, des war scho schräg bei dera Bürgermeisterwahl in Insanbul. Der Erdogan und seine AKP, des is a komplett undemokratischer Haufen."
Der Schwarze: "Was hoasst da Bürgermeisterwahl in Istanbul und Erdogan? I red von der letztn Bundespräsidentenwahl, vom Strache und der FPÖ!"